Hamas ta roƙi Iran da ta guji kai hari kan ƙasashe maƙwabta

Ƙungiyar ta jaddada haƙƙin Tehran na kare kanta tare da kira da a dakatar da yaƙin Gabas ta Tsakiya Ƙungiyar gwagwarmayar Falasɗinawa ta Hamas ta yi kira ga Iran da ta guji kai hari kan ƙasashe maƙwabta, yayin da take jaddada cewa Tehran na da haƙƙin kare kanta daga hare-haren Isra’ila da Amurka . A cikin wata sanarwa da ta fitar ranar Asabar, ƙungiyar ta ce duk da cewa Iran na da damar mayar da martani bisa dokokin ƙasa da ƙasa, tana roƙon ta da ta guji kai farmaki kan ƙasashen makwabta. Wannan shi ne karo na farko da Hamas ta yi irin wannan kira a bainar jama’a ga Tehran. Hamas ta kuma bukaci ƙasashen duniya su ɗauki matakai domin dakatar da yaƙin da ya mamaye Gabas ta Tsakiya tun ranar 28 ga watan Fabrairu. Ƙungiyar ta tunatar da cewa Iran ta daɗe tana ba da tallafin siyasa, diflomasiyya da na soja ga gwagwarmayar Falasɗinawa, kamar yadda ta bayyana bayan kisan jagoran addinin Iran Ali Khamenei , wanda ta kira babban laifi. Wani jami’in Hamas ya shaida wa kamfanin dillancin labarai na AFP cewa ƙungiyar na ci gaba da tattaunawa da jami’an Iran kan halin da ake ciki, yana mai zargin Isra’ila da ƙoƙarin haddasa sabani tsakanin Iran da ƙasashen Larabawa da Musulmi. A halin yanzu, Iran na ci gaba da mayar da martani ga hare-haren Amurka da Isra’ila ta hanyar amfani da makamai masu linzami kan wasu ƙasashe da dama. Tushen labari: Newstimehub