Twiga nchini Kenya wahamishwa maeneo bora

Huduma ya Wanyamapori nchini Kenya, KWS inasema zoezi la kuhamisha wanyama linalenga kujaza makazi ambayo hayatumiki. Huduma ya Wanyamapori nchini Kenya, KWS, imewahamisha twiga watano kutoka sehemu tofauti nchini. Zoezi hilo ni chini ya mpango muhimu wa kurudisha wanyama katika hifadhi zaTundra Conservancy na Kambi Msituni katika Kaunti ya Laikipia. Zoezi hili lililoratibiwa kwa umakini linahusisha kuhamisha twiga watano kutoka Solio Ranch Conservancy hadi Tundra Conservancy, na twiga wawili kutoka Lolmarik Conservancy hadi Kambi Msituni. “Kupitia harakati hizi za kimkakati, KWS inalenga kujaza makazi ambayo hayatumiki sana, kuhakikisha maisha ya muda mrefu ya spishi kwa kuwaweka katika mazingira yanayofaa zaidi, huku pia ikiondoa shinikizo kwenye maeneo yenye wakazi wengi,” KWS imesema katika akaunti yake ya mtandao. “Uhamishaji ni zana muhimu ya uhifadhi ambayo sio tu inasaidia kusawazisha mifumo ya ikolojia lakini pia kupunguza migogoro kati ya binadamu na wanyamapori na kupunguza hatari za uharamia kwa wanyama pori,” imeongezea. Kwa kusogeza wanyamapori karibu na maeneo yaliyolindwa yenye mifumo thabiti ya usimamizi, wataalamu wa wanyama wanasema inahimiza kwao kuishi pamoja na kulinda jumuiya za ndani na spishi za kipekee nchini. Mpango huo unaambatana kikamilifu na Mpango Mkakati wa KWS 2024–2028, ambao unasisitiza upanuzi wa makazi na kuimarisha ushirikiano na wadau wa uhifadhi ili kupata mustakabali wa urithi wa wanyamapori wa Kenya.