Turkiyya ta yi Allah-wadai da "mamaya da cin zali" na Isra'ila da kalaman tsokana na ministocinta

Dangane da hare-haren da Isra'ila ta kai a lokaci guda ta sama da ta kasa a wurare da dama a Siriya a ranar Laraba, Ankara ta ce babu wata tsokana ko barazana daga bangaren Siriya. Ma'aikatar Harkokin Wajen Turkiyya ta yi kakkausar suka kan kalaman da ministocin Isra'ila suka yi a baya bayan nan, tana mai cewa kalaman na tsokana ne da kuma nuni da manufofin Isra'ila na "cin zali da mamaya”. A cikin wata sanarwa da ta fitar a yammacin ranar Alhamis, ma'aikatar ta soki gwamnatin Isra'ila, inda ta zarge ta da rura wutar rikicin yankin. Ma'aikatar ta yi tambaya kan dalilin da ya sa Isra'ila ta damu da abubuwan da ke faruwa a Siriya da Lebanon, wanda ta bayyana a matsayin wani kyakkyawan fata na samun zaman lafiya da kwanciyar hankali a yankin. Ta kuma jaddada cewa, wadannan ci gaban na samun goyon bayan kasashen duniya da dama, don haka bai kamata a rika kallonsu a matsayin barazana ba. Martanin na Turkiyya ya zo ne a matsayin martani ga kalaman Ministan Harkokin Wajen Isra'ila Gideon Saar game da kasancewar Turkiyya a Siriya da Labanon, da sauran yankuna. Isra'ila ta kai hari ta sama da ta kasa a Siriya Dangane da harin da Isra'ila ta kai a lokaci guda ta sama da ta kasa a wurare da dama a Syria a ranar Laraba, sanarwar ta yi nuni da cewa babu wata tsokana ko barazana daga bangaren Syria. Turkiyya ta ce wadannan hare-hare wani bangare ne na manufofin ƙetare na Isra'ila, wanda ta yi iƙirarin cewa ba su ta’allaƙa a kan komai ba sai rura wutar rikici. Turkiyya ta zargi jami'an Isra'ila da yunkurin karkatar da hankali daga ayyukan da suke yi a Gaza, da Yammacin Gabar Kogin Jordan da ma sauran su. Ma'aikatar ta bayyana cewa, mamayar matsugunan da Isra'ila ke yi, da aniyarta ta mallaka, da kuma hare-haren da take kaiwa a Syria da Lebanon, na da matukar barazana ga tsaron yankin. Kira ga kasashen duniya don su dakatar da dabarun Isra’ila na hargitsa yankin Ma'aikatar Harkokin Wajen Turkiyya ta kuma bayyana Isra'ila a matsayin "mai tayar da hankali" da ke da alhakin rura wutar rikici da ta'addanci. Turkiyya ta yi kira ga Isra'ila da ta kawo karshen mamayar da take yi wa yankunan Falasdinawa tare da dakatar da kawo cikas ga kokarin maido da kwanciyar hankali a Siriya. Ma'aikatar ta kuma bukaci kasashen duniya da su dauki alhakin dakile abin da ta bayyana a matsayin "muguntar Isra'ila ke ƙaruwa." Sanarwar ta sake jaddada aniyar Turkiyya na samar da zaman lafiya da kwanciyar hankali a yankin tare da yin Allah wadai da manufofin Isra'ila a matsayin wani babban cikas ga tsaro a yankin Gabas ta Tsakiya.