Tinubu ya ba da umarnin fitar da kuɗi domin bunƙasa sararin samaniyar Nijeriya

Shugaban ƙasar ya jaddada aniyar gwamnati wajen aiwatar da sabon shirin shekaru 25 na ci gaban sararin samaniya Shugaban Nijeriya Bola Tinubu ya bayar da umarnin fitar da kuɗi nan take domin gyara da bunƙasa kayayyakin aikin sararin samaniyar ƙasar, a wani mataki na inganta fannin sararin samaniya. Ya ce an amince a tura kuɗin da ake buƙata zuwa Majalisar Zartarwa ta Tarayya domin nazari da amincewa da sabon shirin shekaru 25 na bunƙasa wannan fanni. Tinubu, wanda Mataimakin Shugaban Ƙasa Kashim Shettima ya wakilta, ya bayyana hakan ne a ranar Talata yayin taron farko na Hukumar Sararin Samaniyar Nijeriya da aka gudanar a fadar shugaban ƙasa da ke Abuja. Ya jaddada cewa Nijeriya ba za ta tsaya a matsayin mai kallo ba yayin da fannin sararin samaniya ke ƙara bunƙasa a duniya. Ya ce dole ne a gina tsarin sararin samaniya da zai amfani fannoni daban-daban na rayuwa, ciki har da noma, ilimi, bincike, kasuwanci da tsaro, tare da taimaka wa masu tsara manufofi wajen yanke shawara bisa hujjoji. A cewarsa, hakan na daga cikin manufofin gwamnatin sa na inganta tattalin arziki da rayuwar al’umma. Tinubu ya kuma bayyana cewa zuba jari a fannin sararin samaniya na da muhimmanci wajen bunƙasa fasaha, tattalin arziki da kuma tsaro, yana mai cewa ana sa ran tattalin arzikin sararin samaniya a duniya zai zarce dala tiriliyan ɗaya nan da shekarar 2040. Ya ƙara da cewa irin wannan jarin zai taimaka wajen inganta noma na zamani, tsaron iyakoki, tsarin gargaɗin ambaliyar ruwa da gobara, da kuma samar da ingantacciyar sadarwa da tattalin arzikin intanet mai ƙarfi. Tushen labari: Newstimehub