Shugaba Mahama Ya Sanar da Karin Albashin Sojoji

Ƙarin albashi zai fara aiki daga Maris, tare da biyan bashin baya Shugaban kasar Ghana, John Dramani Mahama, ya sanar da cewa sabon tsarin albashin sojoji zai fara aiki daga watan Maris, tare da biyan karin albashin watan Janairu da Fabrairu. Ya bayyana hakan ne yayin taron 2025 West African Soldiers’ Social Activity (WASA) da aka gudanar a hedkwatar rundunar sojin kasar da ke birnin Accra. (TRT Hausa) Sanarwar ta jawo farin ciki a wajen taron, inda sojoji suka fashe da shewa da tafi bayan jin labarin karin albashin. Taron WASA ana shirya shi ne duk shekara domin hada kan sojoji da kuma yaba musu bisa gudummawar da suke bayarwa wajen kare kasa. (TRT Hausa) Shugaban kasar ya ce bayan shekarar 2020, gwamnatin da ta gabata ba ta tanadi kudade ba dangane da sabon tsarin kudin gratuti, lamarin da ya haddasa bashin da ya haura cedi biliyan daya, wanda ya shafi kusan ma’aikata 3,000 masu mukamai daban-daban. (TRT Hausa) Mahama ya kara da cewa ya umarci Ma’aikatar Kudi da ta gaggauta biyan sojojin da suka yi ritaya bashin sabon tsarin gratuti, musamman tsofaffin da shekarunsu ke tsakanin 95 zuwa 96, yayin da ake ci gaba da shirye-shiryen biyan sauran bashin da suka saura. (TRT Hausa)