Touadera Ya Lashe Wa’adi Na Uku A Jamhuriyar Tsakiyar Afirka

Sakamakon wucin-gadi ya nuna shugaban kasar ya samu sama da kashi 76% na kuri’u Shugaban Jamhuriyar Tsakiyar Afirka, Faustin-Archange Touadera, ya lashe zaɓen shugaban ƙasa karo na uku kamar yadda sakamakon wucin-gadi da Hukumar Zaɓe ta Ƙasa ta fitar ya nuna. Hukumar ta bayyana cewa Touadera ya samu kashi 76.15 cikin ɗari na kuri’un da aka kaɗa a zaɓen da aka gudanar a watan da ya gabata. Tun farko an fara zaɓarsa a shekarar 2016, sannan aka sake zaɓarsa a 2020 da kashi 53.16 cikin ɗari a zagaye na farko. Wannan zaɓe ya biyo bayan kuri’ar raba gardama da aka gudanar a shekarar 2023 kan kundin tsarin mulki, wanda ya cire iyakance wa’adin shugaban ƙasa tare da tsawaita kowane wa’adi zuwa shekaru bakwai, lamarin da ya ba Touadera damar sake tsayawa takara. Touadera mai shekaru 68, tsohon malamin lissafi, ya mayar da hankali a kamfen dinsa kan abin da ya bayyana a matsayin ci gaban da aka samu a bangaren tsaro. Masu sa ido na ƙasashen duniya ciki har da Tarayyar Afirka da rundunar wanzar da zaman lafiya ta Majalisar Dinkin Duniya MINUSCA sun bayyana zaɓen a matsayin wanda ya gudana cikin lumana, duk da matsalolin tsaro da ake fuskanta a wasu sassan gabashin ƙasar. Sai dai ƙawancen ‘yan adawa RBDC ya ƙaurace wa zaɓen, yana mai zargin cewa ba a gudanar da shi cikin adalci ba. Wasu ‘yan takara ciki har da tsoffin firaminista Anicet-Georges Dologuele da Henri-Marie Dondra sun kuma zargi hukumomi da sanya takunkumi ga kamfen dinsu. Kotun Tsarin Mulki na da wa’adin zuwa ranar 20 ga Janairu domin tabbatar da sakamakon zaɓen ko kuma yanke hukunci kan duk wata ƙorafi da aka shigar. Duk da zarge-zargen maguɗi daga wasu ‘yan adawa, kawo yanzu ba a samu rahoton tashin hankali mai tsanani ba bayan kammala zaɓen. Tushen labari: Newstimehub