Trump awafukuza wahamiaji wa Zimbabwe na Ghana hadi Cameroon

Ndege ya kuwafukuza wahamiaji kutoka Marekani yawasili Yaoundé, huku mawakili wakidai hatua hiyo inakiuka maagizo ya mahakama za Marekani Ndege nyingine ya kuwafukuza wahamiaji kutoka Marekani imetua nchini Cameroon, lakini waliorejeshwa si raia wa nchi hiyo na, kwa mujibu wa mawakili wao, hawana uhusiano wowote na Cameroon. Kundi la hivi karibuni linaripotiwa kuwasili katika mji mkuu, Yaoundé, tarehe 16 Februari, wiki chache baada ya wahamiaji wengine tisa kupelekwa huko kimyakimya chini ya sera yenye utata ya uhamiaji ya Rais Donald Trump. Ingawa utaifa wa wahamiaji wa kundi la pili haukufahamika mara moja, kundi la kwanza lilijumuisha wanawake watano na wanaume wanne kutoka nchi kama Zimbabwe, Morocco na Ghana, kwa mujibu wa ripoti za vyombo vya habari. Mawakili Alma David nchini Marekani na Joseph Awah Fru nchini Cameroon walisema hatua ya kuwafukuza wahamiaji hao ilikiuka maagizo ya mahakama za Marekani yaliyokuwa yamewapa ulinzi dhidi ya kufukuzwa. Ikulu ya Marekani imethibitisha safari hiyo ya ndege lakini haijatoa maelezo zaidi kuhusu operesheni hiyo. Katika miezi ya hivi karibuni, Marekani imekuwa ikiwahamisha wahamiaji kutoka nchi mbalimbali za dunia ya tatu na kuwapeleka katika nchi za Afrika kama Sudan Kusini, Rwanda, Uganda, Ghana, Eswatini na Guinea ya Ikweta, chini ya mikataba ya siri ambapo Marekani hulipa nchi hizo kuwahudumia wahamiaji wasiokuwa raia wao. Ripoti ya Seneti ya Marekani inakadiria kuwa zaidi ya dola milioni 40 zimetumika kuwahamisha takriban wahamiaji 300. Wakosoaji na wanaharakati wa haki za binadamu wanasema hatua hiyo inakiuka haki za wahamiaji, hasa wale waliokimbia nchi zao kutokana na hatari za usalama, huku pia kukiwa na hofu kwamba baadhi ya waliorejeshwa wanaweza kuwa wahalifu waliotiwa hatiani Marekani. Chanzo: TRT Afrika #Marekani #Trump #Uhamiaji #Cameroon #Zimbabwe #Ghana #Afrika #HakiZaBinadamu #Diplomasia