NDLEA ta kama tsohon kansila a Legas da kilogiram 40 na tabar wiwi

An kuma kama wani ɗan kasuwa a Abuja da ƙwayoyin tapentadol 1,000 da aka ɓoye a kayan jarirai Jami’an Hukumar Hana Sha da Fataucin Miyagun Kwayoyi ta Nijeriya (NDLEA) sun kama wani tsohon kansila a Jihar Legas tare da wasu miyagun ƙwayoyi, a wani ɓangare na ƙara kaimi wajen yaƙi da fataucin miyagun ƙwayoyi a ƙasar. Wanda ake zargin mai suna Sheleru Sadiq Olalekan, mai shekaru 45, ya taɓa yin wa’adin mulki biyu a matsayin kansila a Ƙaramar Hukumar Ibeju-Lekki ta Jihar Legas. A halin yanzu kuma yana aiki a matsayin mataimaki na musamman ga wani ɗan majalisa. Kakakin NDLEA, Femi Babafemi, ya bayyana a wata sanarwa cewa an kama Olalekan ne a gidansa da ke Ilado a yankin Ibeju-Lekki bayan jami’an hukumar sun samu sahihan bayanan sirri. A binciken da aka yi a gidan, jami’an NDLEA sun gano kilogiram 40 na tabar wiwi nau’in skunk a ɗaya daga cikin ɗakunan gidan. A yayin tambayoyi, wanda ake zargin ya amsa cewa miyagun ƙwayoyin da aka gano nasa ne, kuma gidan da aka same su a ciki nasa ne. A wani samame daban a Abuja, jami’an NDLEA sun kuma kama wani ɗan kasuwa mai shekaru 32 mai suna Emeka Hyginus Okwor. An kama shi ne yayin da yake tafiya da mota daga Obollo-Afor a Jihar Enugu zuwa Zuba a Babban Birnin Tarayya. Binciken da aka yi a cikin kayansa ya nuna cewa ya ɓoye ƙwayoyi 1,000 na tapentadol a cikin ƙunzugun kayan jarirai. Rahotanni sun ce wanda ake zargin ya amsa cewa yana kai ƙwayoyin ne zuwa ƙauyen Guduwa a Ƙaramar Hukumar Gurara ta Jihar Neja, inda yake gudanar da shagon sayar da kayan abinci. Tushen labari: Newstimehub