Kamfanin Turkish Airlines zai sayi jiragen sama na Boeing 225 bayan Trump da Erdogan sun tattauna

An tsara isar da waɗannan jiragen sama tsakanin shekarar 2029 zuwa 2034, in ji kamfanin jirgin saman. Kamfanin Turkish Airlines a ranar Juma’a ya sanar da cewa zai yi odar jiragen sama 75 na Boeing B787 kuma ya kammala tattaunawa kan sayen jiragen sama 150 na 737-8/10 MAX, wanda ya danganta da tattaunawa da kamfanin kera injina na CFM International. A wata sanarwa da aka fitar ga Borsa Istanbul — kasuwar hannayen jari ta ƙasar Turkiyya, wadda ke bayar da turba don ciniki na hannayen jari, cin bashi, da sauran kadarorin kuɗi — Turkish Airlines ya bayyana cewa ya yanke shawarar siyan jiragen sama 75 na B787-9 da B787-10 daga Boeing. An tsara isar da waɗannan jiragen sama tsakanin shekarar 2029 zuwa 2034, in ji kamfanin jirgin saman. Ana ci gaba da tattaunawa da kamfanonin Rolls-Royce da GE Aerospace dangane da injinan jiragen sama, da kuma ayyukan kula da injina don waɗannan jiragen. Turkish Airlines ya kuma tabbatar da cewa ya kammala tattaunawa da Boeing kan siyan wasu jiragen sama 150, wanda ya ƙunshi odar tabbatacce 100 da kuma zaɓi 50 na jiragen sama na 737-8/10 MAX.