Jiragen sojin saman Nijeriya sun kashe ‘yan ta’adda a Borno, Kwara da Katsina

Hare-haren sama sun lalata sansanonin ISWAP da na ɓarayin daji a sassa daban-daban na arewacin ƙasar Rundunar sojin saman Nijeriya ta ce jiragen yaƙinta sun kashe ‘yan ta’adda na ƙungiyar ISWAP da masu garkuwa da mutane da dama a hare-haren da suka kai domin daƙile ta’addanci da fashin daji a wasu sassan arewacin ƙasar. Hare-haren sun auku ne bayan jerin samame na sama da aka kai a wurare daban-daban, ciki har da Mallam Fatori da Shuwaram a Jihar Borno, inda aka kai hari kan sansanonin ‘yan ta’addan ISWAP. A wata sanarwa da daraktan watsa labarai na rundunar, Air Commodore Ehimen Ejodame, ya fitar, ya ce aikin haɗin gwiwar da aka gudanar ranar 9 ga watan Nuwamba 2025 wani muhimmin mataki ne na yaƙin da dakarun Operation Hadin Kai da Operation Fansan Yamma ke yi domin dakile ayyukan ‘yan ta’adda da ƙungiyoyin aikata laifuka a arewacin Nijeriya. Sanarwar ta ce bayan samun bayanan sirri da gudanar da bincike, jiragen yaƙi sun kai hare-hare a kudu maso gabashin Shuwaram da Mallam Fatori, inda aka gano ‘yan ISWAP suna taruwa tare da babura da kwalekwale kusa da Tafkin Chadi. Hare-haren sun lalata mafakar ‘yan ta’addan da wuraren ajiye ababen hawa da makamai, tare da kashe da dama daga cikinsu da kuma rage ƙarfin ƙungiyar a yankin. A wani samame na daban kuma, jiragen sojin saman sun kai hari kan sansanonin ɓarayin daji a Garin Dandi da Chigogo a Jihar Kwara, inda aka ce hare-haren sun haddasa babbar asara ga masu aikata laifukan. Haka kuma jiragen yaƙin da ke ƙarƙashin Operation Fansan Yamma sun kai hari a Dutsin Zango da ke ƙaramar hukumar Kankara a Jihar Katsina, inda aka ce wurin mafakar wani fitaccen ɗan ta’adda ne tare da mayaƙansa. Bayanai sun nuna cewa hare-haren sun lalata wasu muhimman wuraren da ‘yan ta’addan ke amfani da su tare da kashe wasu daga cikinsu. Rundunar ta kuma ce an gudanar da aikin tattara bayanan sirri ta sama a wasu yankuna na arewa maso yamma da suka haɗa da wasu garuruwa a jihohin Zamfara, Kebbi da Kaduna, wuraren da ake zargin hanyoyin zirga-zirgar ‘yan bindiga ne. Rundunar sojin saman ta ce nasarar waɗannan hare-hare a jihohin Borno, Kwara da Katsina na nuna ƙarin ƙoƙarin da ake yi wajen daƙile ta’addanci a ƙasar bisa umarnin babban hafsan sojin saman Nijeriya, Air Marshal Sunday Aneke. Tushen labari: Newstimehub