Haɗin-kai tsakanin Turkiyya da Masar yana da muhimmanci don samun zaman lafiya da tsaron Gabas ta Tsakiya – Erdogan

Ankara da Kairo sun jaddada haɗin gwiwarsu wajen goyon bayan Falasɗinu a yayin da ɓangarorin biyu suka sanya hannu kan yarjeniyoyi 17 don ƙarfafa alaƙa a fannoni daban-daban. Turkiyya da Masar suna da buƙatu iri ɗaya kan lamuran da suka shafi Falasɗinawa, kuma dukkansu suna son ganin Isra'ila ta gaggauta daina kai hare-hare a Gaza, a cewar shugaban Turkiyya Recep Tayyip Erdogan. “Gudunmawar da Turkiyya da Masar suke bayarwa wajen zaman lafiya da kwanciyar hankali a yankin tana da matuƙar muhimmanci,” in ji Erdogan ranar Laraba, a yayin da yake gabatar jawabi ga manema labarai tare da takwaransa na ƙasar Masar Abdel Fattah el Sisi, wanda ke ziyarar aiki a Turkiyya. Wannan ce ziyarar aiki ta farko da Sisi ya kai Turkiyya tun da ya soma mulki a 2014. Ya kai ziyarar ce sakamakon gayyatar da Erdogan ya yi masa. A wani ɓangare na ziyarar da Sisi yake yi, shugabannin biyu sun jagoranci wani Babban Taro Kan Haɗin-Kai tsakanin ƙasashen biyu tare da sanya hannu kan yarjeniyoyi 17 a fannoni daban-daban. "Mun jaddada aniyarmu ta haɗin-kai a dukkan ɓangarori, ciki har da masana'antu da cinikayya da tsaro da kiwon lafiya da muhalli da makamashi,” a cewar Erdogan, wanda ya ƙara da cewa ƙasashen biyu za su kyautata alaƙa a tsakaninsu ta yadda kowane ɓangare zai "ci moriyarta ba.” A nasa ɓangaren, Sisi ya ce ziyarar da ya kai Turkiyya "ta buɗe sabuwar hanya a fannin tattalin arziki da cinikayya,” sannan ya jaddada matsayin ƙasashen biyu game da “wajabcin tsagaita wuta a Gaza da kuma kawo ƙarshen hare-haren da Isra'ila take kai wa a Gabar Yammacin Kogin Jordan.”