Ethiopia yapinga madai ya Trump kuhusu ufadhili wa bwawa la GERD

Abiy Ahmed asema Ethiopia haikupokea msaada wa kifedha wa kigeni kwa GERD. Waziri Mkuu wa Ethiopia, Abiy Ahmed , amekanusha madai ya Rais wa Marekani Donald Trump kwamba bwawa kubwa jipya la nchi hiyo, Grand Ethiopian Renaissance Dam (GERD) , lilifadhiliwa na Marekani. Akizungumza bungeni Jumanne, Abiy alisema ujenzi wa bwawa hilo haukupokea msaada wowote wa kifedha kutoka nje, bali ulitekelezwa kupitia kodi na michango ya wananchi wa Ethiopia walioko ndani na nje ya nchi. Bwawa la GERD, lenye thamani ya takribani dola bilioni 4 na uwezo wa kuzalisha megawati 5,150 za umeme, ndilo kubwa zaidi barani Afrika kwa uzalishaji wa nishati. Misri, ambayo hutegemea Mto Nile kwa asilimia 97 ya maji yake, inaliona bwawa hilo kama tishio kwa usalama wake wa maji. Trump, akizungumza mwezi uliopita katika mkutano wa Davos, alidai bwawa hilo limefadhiliwa na Marekani na linazuia mtiririko wa Nile. Hata hivyo, kampuni ya ujenzi Webuild imesisitiza kuwa mradi huo ulifadhiliwa kikamilifu na Ethiopia, na kwamba hakuna mkopeshaji wa kimataifa aliyekubali kuwekeza. Misri imesema iko tayari kuanzisha tena mazungumzo ya upatanishi kuhusu bwawa hilo, lakini Ethiopia haijatoa majibu rasmi hadi sasa. CHANZO: Newstimehub Abiy Ahmed Donald Trump Ethiopia Grand Ethiopian Renaissance Dam (GERD)