Rikicin Iran na barazana ga farfaɗowar tattalin arzikin Afirka

Tashin farashin mai na iya kawo cikas ga tsare-tsaren manyan bankunan ƙasashen nahiyar Hukumomi a wasu ƙasashen Afirka sun yi gargaɗin cewa tashin gwauron zabi na farashin mai sakamakon rikicin da ke gudana a Iran na iya kawo cikas ga tsarin hada-hadar kuɗi tare da shafar muhimman sassan tattalin arziki kamar hakar ma’adanai. Wannan na iya jefa farfaɗowar tattalin arzikin yankin cikin hatsari. A ‘yan watannin baya, manyan bankunan ƙasashe daga Accra zuwa Luanda sun rage kuɗin ruwa na bashi domin ƙarfafa tattalin arziki bayan raguwar hauhawar farashi da kuma samun daidaito a kasuwar musayar kuɗi. Sai dai masana na ganin cewa wannan tsari na iya tsayawa sakamakon ƙarin rashin tabbas a tattalin arzikin duniya. Babban Bankin Uganda ya ce karuwar rashin tabbas a tattalin arzikin duniya na ƙalubalantar manufofin manyan bankuna, inda ya bayyana cewa zai sake nazarin tsare-tsarensa domin tabbatar da sun dace da sabon yanayin. Haka kuma Babban Bankin Angola ya dakatar da rage kuɗin ruwa bayan ragin sau uku a jere, yana mai nuni da ƙarin haɗari daga yiwuwar tsawaita yaƙin Gabas ta Tsakiya da zai iya shafar hanyoyin jigilar kayayyaki. Masana sun ce ana sa ran manyan bankunan ƙasashe kamar Ghana, Nijeriya, Zambia da Kenya su sake nazarin tsare-tsarensu na rage kuɗin ruwa. Haka kuma bankin JPMorgan ya rage hasashensa ga wasu daga cikin waɗannan ƙasashe saboda tasirin rikicin. Farashin ɗanyen mai na Brent ya kusanci dala 100 a kowace ganga a ranar Juma’a bayan ya kai kusan dala 120 a farkon makon. Masana sun ce idan farashin mai ya ci gaba da kasancewa a wannan mataki, kuɗaɗen ƙasashen Afirka da dama na iya raguwa da kusan kashi 5 cikin 100. Tushen labari: Newstimehub