An tsare tsohon Ministan Kuɗin Ghana Ken Ofori-Atta a Amurka

Jami’an ICE sun tsare shi yayin da lauyoyinsa ke kokarin warware matsalar zamansa a ƙasar Jami’an hukumar shige da fice da hana fasa-ƙauri ta Amurka (ICE) sun tsare tsohon Ministan Kuɗin Ghana, Ken Ofori-Atta. A cewar lauyoyinsa na kamfanin Minkah-Premo, Osei-Bonsu, Bruce-Cathline and Partners (MPOBB), kamun da aka yi masa na da alaƙa da yanayin zamansa a Amurka a halin yanzu. A cikin wata sanarwa da suka fitar ranar Laraba da daddare, sun ce tawagar lauyoyinsa a Amurka na ci gaba da tuntuɓar hukumar ICE, kuma suna sa ran za a warware matsalar cikin gaggawa. Sun bayyana cewa Ofori-Atta yana da takardar neman gyara matsayin zamansa a Amurka, wadda ke bai wa mutum damar zama a ƙasar bisa doka bayan wa’adin takardar izinin zamansa ya ƙare. Lauyoyin sun kuma jaddada cewa tsohon ministan mutum ne mai bin doka, kuma yana ba da cikakken haɗin kai ga hukumomin ICE domin warware matsalar. A halin yanzu, Ken Ofori-Atta da wasu mutum bakwai na fuskantar tuhume-tuhume guda 78 da suka shafi kwangilolin da aka bai wa kamfanin Strategic Mobilisation Ghana Limited (SML). Ofishin Mai Gabatar da Ƙara na Musamman na Ghana ya zarge su da almundahanar kuɗaɗen kwangilar sayo kayayyaki ta hanyar amfani da Ma’aikatar Kuɗi da Hukumar Tattara Haraji ta Ghana. An kuma sanya Ofori-Atta cikin sanarwar ‘yansandan ƙasa da ƙasa a matsayin mutumin da ake nema ruwa-a-jallo, zargi da yake ƙalubalanta. Rahotanni sun ce yana Amurka tun watan Janairun 2025 domin neman lafiya. Tushen labari: Newstimehub