Majalisar Kano ta gabatar da kudirin tsige mataimakin gwamna

Ana zargin Aminu Abdussalam Gwarzo da amfani da kuɗi ba bisa ƙa’ida ba Majalisar Dokokin Jihar Kano ta gabatar da kudirin tsige mataimakin gwamnan jihar, Aminu Abdussalam Gwarzo, a ranar Alhamis. Shugaban masu rinjaye na majalisar, Lawal Hussaini Dala, ya tabbatar da cewa an gabatar da kudirin ne bisa zarge-zarge kusan guda huɗu da suka shafi amfani da kuɗi ba bisa ƙa’ida ba. Ya bayyana cewa dokar majalisa ta tanadi cewa dole sai a samu aƙalla ɗaya bisa uku na ‘yan majalisa sun sanya hannu kafin a gabatar da irin wannan kudiri, sannan idan aka same shi da laifi zai iya rasa kujerarsa. Majalisar ta kuma amince a aika wa mataimakin gwamnan takardar tuhuma, inda aka ba shi wa’adin mako biyu daga ranar da ya karɓi takardar domin ya gabatar da bayaninsa don kare kansa. Rahotanni sun ce rikicin siyasa tsakanin gwamnan jihar Abba Kabir Yusuf da mataimakinsa na ƙaruwa, musamman bayan gwamnan ya sauya sheƙa daga jam’iyyar NNPP zuwa APC, yayin da mataimakin gwamnan ya ƙi bin sa zuwa sabuwar jam’iyyar. Tushen labari: Newstimehub