An gabatar da kudirin doka a Amurka kan takunkumi ga kungiyoyin da ake zargi da tauye ‘yancin addini a Nijeriya

Kudirin ya ambaci kungiyoyin Miyetti Allah tare da neman haramta biza ga mambobinsu An gabatar da wani sabon kudirin doka a Majalisar Dokokin Amurka wanda ke neman sanya takunkumi ga mutane da kungiyoyin da ake zargi da aikata manyan laifuka na tauye ‘yancin addini a Nijeriya. Kudirin ya ambaci Kungiyar Miyetti Allah Cattle Breeders Association of Nigeria (MACBAN) da kuma Miyetti Allah Kautal Hore a matsayin kungiyoyin da ake zargin suna da hannu a irin waɗannan laifuka. Ɗan majalisar wakilai na Amurka, Christopher Smith, ne ya gabatar da kudirin a ranar Talata, inda ya bukaci a sanya takunkumi kan mambobin kungiyoyin. Matakan da kudirin ya tanada sun hada da haramta musu biza zuwa Amurka da kuma ƙwace kadarorinsu na wucin gadi. Christopher Smith ya kuma yaba wa shugaban Amurka, Donald Trump, saboda sake sanya Nijeriya cikin jerin ƙasashen da ake kira Country of Particular Concern (CPC) , wato ƙasashen da ake zargin suna da matsalolin tauye ‘yancin addini. A cewarsa, matakin zai taimaka wajen matsa lamba ga gwamnatin Nijeriya domin ta ɗauki matakai kan hare-haren da ake dangantawa da masu tsattsauran ra’ayi da kungiyoyin da ke haddasa rikici. Kudirin ya kuma bayyana cewa Amurka ta sanya wasu kungiyoyin da ake kira “Fulani masu dauke da makamai” da ke aiki a jihohin Benue da Filato cikin jerin kungiyoyin da ake saka ido a karkashin dokokin ‘yancin addini na kasa da kasa. Bugu da kari, kudirin ya ba da shawarar a samar da gaggawar tallafin jinƙai kai tsaye ga kungiyoyin addini domin taimaka wa mutanen da rikice-rikice suka raba da matsugunansu a jihohin tsakiyar Nijeriya. Tushen labari: Newstimehub